Íslenskir leigjendur ganga í Alþjóðasamtök leigjenda

Íslenskir leigjendur ganga í Alþjóðasamtök leigjenda
Stjórn Alþjóðasamtaka leigjenda fagna Guðmundi Hrafni Arngrímssyni og Laufeyju Líndal Ólafsdóttur, fulltrúum Samtaka leigjenda á Íslandi þegar þau fengu aðild að alþjóðasamtökunum.

N4 ritstjórn17.06.2022

Á fundi stjórnar Alþjóðasamtaka leigjenda sem haldinn var í Helsinki í Finnlandi þann15. júní var umsókn Samtaka leigjenda á Íslandi að samtökunum samþykkt. Íslensku leigjendasamtökin tengjast þar með öflugu neti sterkra leigjendasamtaka víða um lönd.
 

„Ég trúi að þetta hafi verið heillaskref,“ segir Guðmundur Hrafn Arngrímsson formaður Samtaka leigjenda á Íslandi í fréttatilkynningu frá samtökunum „Það er mikilvægt fyrir ung og enn ómótuð samtök að geta sótt í reynslu þeirra sem eru komin lengra. Innan þessara samtaka eru félög sem hafa með baráttu sinni náð að umbylta húsnæðismarkaðnum í sínum löndum. Við munum sækja í reynslu þessa fólks.“

Öflug samtök frumforsenda

Á fundinum í Helsinki kynntu Guðmundur og Laufey Líndal Ólafsdóttir, stjórnarmaður Samtökum leigjenda og Félagsbústöðum, íslenska leigumarkaðinn fyrir stjórnarmönnum Alþjóðasamtaka leigjenda. Skiljanlega var þeim nokkuð brugðið yfir hversu vanþroska hann er og hversu litla vernd leigjendur hafa. Á eftir fylgdu heitstrengingar um stuðning Alþjóðasamtakanna við
baráttu leigjenda á Íslandi. „Í þessu hópi var öllum ljóst að frumforsenda bættrar stöðu leigjenda er öflug leigjendasamtök,“ sagði Guðmundur. „Félögum okkar fannst við hafa náð miklum árangri á skömmum tíma en voru líka meðvituð um að það er langur vegur framundan og einhverjar brekkur. Sumt af þessu fólki kemur á norrænt þing leigjenda sem við stöndum fyrir í Reykjavík í haust og þar verður sérstaklega rætt um baráttuna á Íslandi.“

 

Deila