Kirkjan í Grímsey klædd með lerki

Kirkjan í Grímsey klædd með lerki
Mynd: Nikolai Galitzine

N4 ritstjórn10.09.2022

Bygging nýrrar kirkju í Grímsey hefur staðið yfir í sumar. Kirkjan er nú orðin fokheld og verður á næstu dögum klædd að utan með lerki og stuðlabergsskífur eru á leið á þakið. 

Að reisa byggingar í Grímsey, nyrstu byggð Íslands krefst mun meiri fyrirhafnar og kostnaðar en í landi. Til eyjarinnar þarf að flytja allt byggingarefni sjóleiðina og sömuleiðis jarðefni s.s. möl og sand. Varðskipið Þór, skip Landhelgisgæslu Íslands lagði upp í reglulega eftirlitsferð frá Reykjavík í síðustu viku og tók með sér stuðlabergsskífur sem fara á þak nýju kirkjunnar. Í morgun kom skipið til Grímseyjar og efnið var flutt á gúmbátum í land. Fyrr í sumar kom skipið með timbur og grjót til kirkjubyggingarinnar.

 

Brunans minnst þann 21. september

Á dögunum var kirkjan orðin fokheld og turninum komið fyrir á sínum stað. Á næstu dögum hefst vinna við að koma stuðlabergsskífunum fyrir á þaki kirkjunnar og að klæða hana með lerki að utan. Þann 21. september næstkomandi er ár liðið frá bruna hinnar gömlu Miðgarðakirkju. Þann dag munu Grímseyingar og gestir koma saman í nýju kirkjunni og minnast þeirrar og gleðjast yfir vel unnu verki. Friðrik Ómar Hjörleifsson tónlistarmaður, er meðal þeirra sem fram munu koma, en húsið er auk helgihalds, sérstaklega hannað til tónlistar- og menningarviðburða.

 

Vígð sumarið 2023

Í vetur verður kirkjan innréttuð og næsta vor gengið frá umhverfi hennar, en jarðrask varð umtalsvert meira en búist var við vegna fornleifafundar og bleytu í sumar. Fyrirhugað er að vígja nýja Miðgarðakirkju sumarið 2023, en nú er unnið að því að ljúka fjármögnun hennar. Hægt er að fylgjast með gangi fjársöfnunarinnar á heimasíðunni, www.grimsey.is/kirkja Þeir sem vilja styrkja bygginguna geta lagt inn á söfnunarreikning Miðgarðskirkju:
Kennitala: 460269-2539, Reikningsnúmer: 565-04-250731

 

N4 hefur nokkrum sinnum heimsótt Grímsey en hér fyrir neðan má sjá samantektarþátt frá árinu 2019 um eitt og annað áhugavert á eyjunni. 

 

Deila