laugardagur 13. nóvember 2021

Leikarar óskast í nýtt leikverk með lögum Bjartmars Guðlaugssonar

Leikarar óskast í nýtt leikverk með lögum Bjartmars Guðlaugssonar
Tónlistarmaðurinn Bjartmar Guðlaugsson verður 70 ára á næsta ári og því vel við hæfi að setja upp leikverk honum til heiðurs með hans allra bestu lögum.

N4 ritstjórn24.11.2021

Leikfélag Hörgdæla ætlar að setja upp glænýtt leikrit með lögum Bjartmars Guðlaugssonar á nýju ári. Leitað er að leikurum á öllum aldri og verða áheyrnarprufur haldnar í byrjun desember.

Verkið heitir „Í fylgd með fullorðnum“ og er Pétur Guðjónsson höfundur verksins og jafnframt leikstjóri, en hann er eigandi Draumaleikhússins og hefur í gegnum tíðina skrifað ýmis leikrit. Eins og nafnið gefur til kynna er leikritið byggt á tónlist Bjartmars Guðlaugssonar, en Pétur hefur borið þá hugmynd með sér um alllangt skeiðað skrifa leikrit með tónlist hans. Frumsýning 2022 er engin tilviljun því það ár verður Bjartmar sjötugur og sýningin sett upp honum til heiðurs. Meðal laga sem eru í sýningunni eru: Týnda kynslóðin, Bissí Krissí, Ljóð um þig, Þegar þú sefur, Með vottorð í leikfimi, Þannig týnist tíminn og fleiri og fleiri.

Leikrit um sorg og gleði

Leikritið fjallar um Birnu sem stendur á tímamótum í lífinu. Það má segja að seinni hálfleikur blasi við. Hún lítur um öxl og ýmislegt kemur í ljós og margt er þar óuppgert. Birna segir okkur söguna af sjálfri sér, foreldrunum Krissý og Sumarliða og fyrstu ástinni honum Engisprettu-Haraldi. Sagan er í senn drepfyndin, grátbrosleg, dramatísk og sorgleg en líka bráðfjörug. Áheyrnarprufur fyrir „Í fylgd með fullorðnum“ verða fyrstu vikuna í desember og verður óskað eftir leikurum á öllum aldri.

N4 heimsótti Leikfélag Hörgdæla í þættinum Bakvið tjöldin en þar er m.a. saga leikfélagisns rakin. Innslagið má sjá hér fyrir neðan.