Innblástur úr íslenskri náttúru og suðrænum spænskum sumrum

Innblástur úr íslenskri náttúru og suðrænum spænskum sumrum
Við Löðmundarvatn heitir þessi vatnslitamynd eftir Ragnar Hólm.

N4 ritstjórn22.07.2021

Norðlenski listamaðurinn, Ragnar Hólm Ragnarson, opnar málverkasýningu í Listhúsi Ófeigs, í Reykjavík á laugardaginn. Þar sýnir hann bæði vatnslitaverk og olíumálverk og eru litirnir í verkunum annars vegar sóttir í sjóðheit spænsk sumur og hins vegar í hlýja tóna íslenskar náttúru.

Málverkasýningin ber heitið Suðrið andar og opnar hún laugardaginn 24. júlí í Listhúsi Ófeigs að Skólavörðustíg 5 í Reykjavík. Þetta er 19. einkasýning Ragnars og að þessu sinni sýnir hann ný olíumálverk og vatnslitamyndir. Í fréttatilkynningu frá Ragnari segir að málverkin séu að mestu óhlutbundin eða abstrakt expressjónísk og þar blandast saman heitir suðrænir litir og jarðarlitir Íslands. Spænsk áhrif eru á köflum nokkuð augljós en Ragnar hefur síðustu árin varið talsverðum tíma á Spáni og sótt þar ýmis námskeið í meðferð lita. „Það er alltaf gaman að eiga við vatnslitina og ég hef reynt að temja mér það að æfa mig á hverjum degi. Hins vegar er krafturinn sem olíulitirnir bjóða upp á mjög freistandi og mér finnst gaman að tefla saman djörfum tónum sem minna mig á sumrin í Andalúsíu og þyngri en þó hlýjum tónum íslenskrar náttúru,“ segir Ragnar Hólm um verkin sín.

Amazon.JPG

Olíumálverkið sækir á

Ragnar er fæddur á Akureyri 1962. Hann hefur unnið að kynningarmálum fyrir Akureyrarbæ og einnig sem aðstoðarmaður bæjarstjóra. Síðasta rúma áratuginn hefur hann notið handleiðslu myndlistarmannsins Guðmundar Ármanns og einnig nokkrum sinnum sótt námskeið hjá hinum þekkta sænska vatnslitamálara Björn Bernström, auk þess að hafa tekið þátt í fjölda vinnustofa og sótt námskeið hjá ólíkum málurum á Spáni og Ítalíu. Verk Ragnars hafa verið valin á fjölda samsýninga evrópskra vatnslitamálara, nú síðast í Fabriano á Ítalíu skömmu fyrir kófið. Síðustu árin hefur olíumálverkið orðið æ fyrirferðarmeira í list Ragnars.

Ragnar Hólm hefur nokkrum sinnum rætt um listsköpun sína á N4. Við drögum hér fram viðtal sem tekið var við hann fyrir fimm árum en þá var hann að opna sýningu á vatnslitamyndum sínum á Dalvík.