Öldrunarheimili Akureyrar: Nýtt starfsfólk á aðra kjarasamninga

Öldrunarheimili Akureyrar: Nýtt starfsfólk á aðra kjarasamninga
„Það er ljóst að launin hjá sveitarfélögunum eru umtalsvert hærri en hjá öðrum fyrirtækjum í velferðarþjónustu," segir Ásthildur Sturludóttir.

Karl Eskil Pálsson27.04.2021

Nýir starfsmenn Öldrunarheimila Akureyrar fara á aðra kjarasamninga en þeir sem þegar starfa þar, þetta segir Ásthildur Sturludóttir bæjarstjóri á Akureyri. Heilsuvernd Hjúkrunarheimili ehf tekur við rekstrinum um mánaðamótin.

Sjúkratryggingar Íslands hafa samið við Heilsuvernd Hjúkrunarheimili ehf í Kópavogi um rekstur hjúkrunarheimila á Akaureyri, samningurinn gerir það að verkum að Heilsuvernd verður með stærri vinnuveitendum Akureyrar. Ásthildur Sturludóttir bæjarstjóri segist treysta því starfsemin og þjónustan verði áfram jafn öflug og hún hefur verið hjá bænum. Hún segir að lög um aðilaskipti tryggi að núverandi starfsmenn haldi sínum kjörum út samningstímabil gildandi kjarasamninga.

Önnur kjör

„Það er ljóst að launin hjá sveitarfélögunum eru umtalsvert hærri en hjá öðrum fyrirtækjum í velferðarþjónustu. Starfsfólkið sem er hjá Akureyrarbæ nú þegar mun færast yfir á sömu kjör og eru í dag, þar til nýir kjarasamningar verða gerðir. Starfsmannaveltan er mikil og nýtt starfsfólk fer á nýja kjarasamninga þegar það er ráðið til starfa. Kostnaðurinn við reksturinn lækkar því mjög fljótlega, þegar nýtt fólk er ráðið inn á öðrum kjarasamningum.“

Áttu við að nýr starfsmaður sem hefur störf 1. júní eða 1. júli taki þá laun eftir öðrum kjarasamningum ?

„Hann fer á aðra kjarasamninga, miðað við þá starfsmenn sem fyrir eru. Lög um aðilaskipti tryggja að núverandi starfsmenn halda sínum réttindum út samningstíma gildandi kjarasamninga.“

Ítarlega verður rætt við Ásthildi Sturludóttur um fjármál Akureyrarbæjar í Landsbyggðum á N4, nk. fimmtudagskvöld.