Risa ráðstefnuhelgi í Háskólanum á Akureyri

Risa ráðstefnuhelgi í Háskólanum á Akureyri
Mynd: Unsplash/Thought Catalog

N4 ritstjórn08.09.2022

Um helgina verður haldin risastór ráðstefnuhelgi á vegum MSHA í Háskólanum á Akureyri og er von á 300 ráðstefnugestum. 

Námstefna í Byrjendalæsi verður haldin 9. september í tengslum við ráðstefnuna Læsi fyrir lífið, skilningur, tjáning og hlustun sem haldin verður 10. september. Báðir viðburðir verða í Háskólanum á Akureyri.  Námstefna í Byrjendalæsi er viðburður fyrir alla áhugasama um læsi og læsiskennslu á yngsta stigi grunnskólans. Námstefnan er haldin annað hvert ár og hana sækja kennarar sem kenna eftir aðferðum Byrjendalæsis auk annars áhugafólks um læsi og læsiskennslu. Aðalfyrirlesarar á námstefnunni eru þau Ross Young, starfsþróunarráðgjafi, rannsakandi og námsgagnahöfundur og Sigrún Helga Snæbjörnsdóttir, sérkennari í Síðuskóla. Ross mun fjalla um ritun og áhugahvöt í sínu erindi en Sigrún Helga um börn með fjölbreyttan tungumálabakgrunn og hvernig Byrjendalæsi styður við nám ÍSAT nemenda. Auk aðalerinda verður boðið upp á málstofuerindi og vinnustofur þar sem viðfangsefnin eru fjölbreytt og lögð áhersla á hagnýta tengingu og hugmyndir sem kennarar geta nýtt sér inn í veturinn. Ævar Þór Benediktsson, rithöfundur og leikari, lokar námstefnunni en hann mun deila með námstefnugestum vangaveltum sínum um lestur og læsi.

 

Mikilvægi sköpunarkrafsins

Í kjölfarið, laugardaginn 10. september, verður ráðstefnan Læsi fyrir lífið, skilningur, tjáning og miðlun verður haldin í Háskólanum á Akureyri einnig á vegum Miðstöðvar skólaþróunar við Háskólann á Akureyri og Menntamálastofnunar. Ráðstefnan er haldin annað hvert ár og hefur hún verið vinsæll vettvangur fyrir áhugafólk um læsi. Á ráðstefnunni verður sjónum beint að læsi og læsiskennslu og fjallað um málefnið frá út frá margvíslegum sjónarhornum. Efni ráðstefnunnar sniðið að læsi í leik-, grunn-, og framhaldsskóla.Á ráðstefnunni verða þrjú aðalerindi sem fjalla um mikilvægi þess að virkja sköpunarkraft og áhugahvöt nemenda og gefa þeim verkfæri til að tjá sig og miðla hugsunum sínum og skoðunum á árangursríkan hátt. Það er Kristín Ragna Gunnarsdóttir, mynd- og rithöfundur, hugmyndasmiður, kennari og ritstjóri Risastórra smásagna 2021-2022, Ross Young, starfsþróunarráðgjafi, rannsakandi og námsgagnahöfundur og Vilhjálmur Bragason, leikari, leikskáld og tónlistarmaður sem flytja erindin. Auk aðalfyrirlestra verður boðið upp á málstofuerindi og vinnustofur þar sem reifuð verða ýmis mál er lúta að læsi og horft sérstaklega til þess að viðfangsefnin hafi hagnýtt gildi fyrir þátttakendur. Nánari upplýsingar hér.

Deila