miðvikudagur 29. desember 2021

Rússneskt fyrirtæki kaupir meirihluta í Vélfag

Rússneskt fyrirtæki kaupir meirihluta í Vélfag
Stofnendur Vélfags, Bjarmi og Ólöf. Þau verða áfram framkvæmdastjórar fyrirtækisins. Mynd: velfag.com/Silfá Huld Bjarmadóttir

N4 ritstjórn06.01.2022

Gengið hefur verið frá sölu á 54,5 % hlut í Vélfagi ehf til rússneska fyrirtækisins Norebo, eins stærsta útgerðarfélags heims. Stofnendur Vélfags, Bjarmi Arnfjörð Sigurgarðarsson og Ólöf Ýr Lárusdóttir seldu hlut í félaginu og um leið var hlutafé aukið. Kaupverð er trúnaðarmál.

Samkvæmt fréttatilkynningu frá Vélfag eru viðskiptin afar ánægjuleg fyrir fyrirtækið og gríðarleg viðurkenning fyrir eigendur og starfsfólk. Mikill fengur er í Norebo sem hluthafa og samstarfsaðila, kaupin styrkja mjög stoðir Vélfags og búa fyrirtækið undir aukið þróunarstarf og verulega aukningu í framleiðslu.

Öflugt frumkvöðlastarfssemi

Vélfag var stofnað árið 1995 af þeim Bjarma og Ólöfu. Fyrst í stað var fyrirtækið í þjónustu við fyrirtæki í sjávarútvegi en fljótlega hófu starfsmenn Vélfags að þróa og framleiða vélar fyrir fiskvinnslu. Óhætt er þó að segja að fyrirtækið hafi lagt mikinn metnað og kraft í þróun á vélum, sem hefur skilað mjög góðum árangri. Vélfag er framsækið nýsköpunarfyrirtæki, sem byggir á öflugu frumkvöðlastarfi. Fyrirtækið hefur hlotið nýsköpunarverðlaun og á síðasta ári fékk það nýsköpunarstyrk að upphæð 50 milljónir frá Rannís Tækniþróunarsjóði til þróunar á vél, sem er í einkaleyfisferli. Í farvatninu eru stórir sölusamningar og óhætt að segja að framundan séu mjög áhugaverðir og bjartir tímar hjá Vélfagi. Stjórn félagsins munu skipa Finnbogi Baldvinsson fyrir hönd Bjarma og Ólafar, en aðrir í stjórn eru Soling Yip, fjármálastjóri Norebo Overseas Holding og Pavel Kosolapov, framkvæmdastjóri tæknimála hjá Norebo Group. Framkvæmdastjórar Vélfags verða sem áður Bjarmi Arnfjörð Sigurgarðarson og Ólöf Ýr Lárusdóttir.