Svanhildarstofa opnar á Hælinu

Svanhildarstofa opnar á Hælinu
Svanhildur með einkasoninn Ólaf Ragnar Grímsson.

N4 ritstjórn17.11.2022

Sunnudaginn 20. nóvember verður Svanhildarstofa opnuð formlega á HÆLINU setri um sögu berklanna á Kristnesi.  Svanhildur Ólafsdóttir Hjartar var móðir Ólafs Ragnars Grímssonar fyrrverandi forseta og hún glímdi við berkla megnið af sinni ævi. 

Í Svanhildarstofu er Svanhildar minnst en þar hefur verið  komið fyrir upplýsingum og sýningargripum, sem tengjast sögu hennar,á lifandi og áhrifaríkan hátt. Hr Ólafur Ragnar flytur ávarp og les upp úr nýútkominni bók sinni; Bréfin hennar mömmu við opnun stofunnar.  Hann mun lesa kl. 14 og svo aftur kl. 15.  Allir velkomnir meðan húsrúm leyfir. Frítt er inn á sýninguna um Hvíta dauða.

 

Bréf í blárri tösku

 Í fréttatilkynningu frá Hælinu segir eftirfarandi um bréfin sem fundust óvænt þegar verið var að undirbúa Svanhildarstofu:  Í hálfa öld lágu bréf í blárri tösku sem enginn vissi af. Það var óvænt ánægja og sterk upplifun fyrir Ólaf Ragnar Grímsson, fyrrverandi forseta Íslands, að uppgötva þau nýverið. Þegar hann yfirgaf Bessastaði 2016 fór hann með töskuna ásamt 200 öðrum kössum beint á Þjóðskjalasafnið til varðveislu. Við undirbúning Svanhildarstofu hér á HÆLINU var Ólafur spurður hvort ekki væru til bréf frá móður hans er hún dvaldist langdvölum á berklahælum, bæði á Vífilsstöðum og Kristnesi. Hann taldi það ekki vera, hafði aldrei heyrt af því en datt þó í hug að mögulega gæti eitthvað leynst í bláu töskunni. Það reyndist rétt vera. Tugir bréfa sem lýsa ást, söknuði, vonbrigðum, æðruleysi og eilífri von og gefa magnaða innsýn í líf berklasjúklinga en einnig tíðarandann um miðja síðustu öld.

 

Deila