Ungt fólk á Akureyri vill mæta seinna í skólann

Ungt fólk á Akureyri vill mæta seinna í skólann
Telma Ósk Þórhalllsdóttir og Þura Björgvinsdóttir fulltrúar í Ungmennaráði.

N4 ritstjórn05.10.2021

Fyrir viku var bæjarstjórnarfundur unga fólksins haldinn á Akureyri en árlega fundar Ungmennaráð Akureyrar með bæjarstjórn. Svefngæði ungmenna voru m.a. rædd á fundinum og lagt til að skólar á Akureyri hefjist seinna á morgnana.

„Þetta er frábær leið til þess að sjá inn í verkferla bæjarins og koma málefnum og skilaboðum beint til bæjarstjórnar og fá þá svör beint frá fulltrúum í bæjarstjórn," segir Telma Ósk Þórhallsdótti, fulltrúi í Ungmennaráði Akureyrar um fundinn í síðustu viku. Fundinn sátu fulltrúar í bæjarstjórn og svöruðu þeir hverju málefni fyrir sig sem er að sögn Telmu mjög gagnlegt. „Við fáum beint að vita hvar málefnið stendur, hvort það sé svipað málefni í kerfinu, hvert það myndi fara, hvort það sé mögulegt og hvernig þeim lýst á hugmyndina. "

Fleiri ruslatunnur og Akureyrarapp

Á fundinum að þessu sinni voru níu málefni til umræðu. Meðal annars tæknilæsi ungmenna, ruslatunnumál í bænum, staða heimanáms innan skóla, svefn ungmenna og Akureyrarappið . Þura Björgvinsdóttir vakti máls á svefngæðum ungmenna og lagði til að skólar í bænum myndu byrja seinna á morgnana. „Ég er búin að lesa mikið af rannsóknum sem sýna að unglingar ættu að sofa lengur á daginn og byrja daginn seinna," segir Þura sem lagði til að Akureyrarbær myndi láta skólana byrja kl. 9. Þura og Telma Ósk voru gestir í Föstudagsþættinum á N4 og sögðu þar að þessi hugmynd hefði fengið jákvæðar undirtektir, enda á stór hluti bæjarfulltrúanna foreldrar unglinga og þekkja því málið vel af eigin raun.

HÉR má lesa nánar um það sem rætt var á fundinum.

Deila